Taqneret taryaqviit irnilartut et'gatellriami, qaugyalilriami, qurrlulegmi yuurvillermeggni. Ciumek arnaq taryaqvak qaugyami et'galngurmi unglulilartuq pamyumikun atlitun angtalriamek ukinermek. Qaqiucami-llu qurrluni melugnek. Taqngan-llu angucaluum qurrviklaraa fertilize-arluki-gguq tua-i kass'atun. Tua-i-llu unilluku cali allamek tuaten cali pilutek. Arnaq qurr'aqan angucaluum murilkelaaraa. 2,000 wall'u 10,000 kayangut tekilluki irnilartuq atauciq arnaq taryaqvak. Kayangut tuk'lartut pingayun wall'u cetaman iralut kinguatni. Qaguyam-llu akuliini iirumaurluteng ner'arluteng aqsameggni caqutmek. Angliqameng-llu ayagluteng imarpiim tunginun.

Ayagaqameng imarpigmun amlleq nerumalartuq. Yaqulget allat ungungssit cali-llu allat neqet wall'u imarpigmiutaat nerlarait. Amlleq-llu cali tuqucimalartuq maaggun yuut qucatellratgun. Kass'atun apqiitnek pollution-aakun.

Imarpigmun tekitaqameng taryaqviit uitalalliniut arvinlek wall'u talliman allrakut tekilluki. Tamani nerarluteng shrimp-anek, squid-anek, mikcuarnek-llu neqcuarnek.

Imarpimtelnguaqameng utertelartut yuurvillermeggnun cali irniyarturluteng. Ataam mayu'urqameng amlleq cali tuqucimalartuq maaggun yugteggun, cali-llu ungungssitgun wall'u allatgun imarpigmiutatgun. Irnirraarluteng tuqulartut taryaqviit. Atlantic-aarmiutaat taugken utertenqigtaarluteng imarpigmun tallimaq tekilluku.

Back to Akula's Main Page

To send questions or comments, please contact Akula Elitnaurvik